Tuesday 16 August 2011

༄༅། །དཔའ་བོ་ཚེ་དབང་ནོར་བུ་ལགས།


ཁ་ས་རྒྱ་གར་རང་བཙན་གྱི་ཉིན་མོར།
ཆར་སིམ་སིམ་རྒྱུན་ཆད་མེད་བབས་ཀྱང་།
དགའ་སྤྲོའི་ངང་གཞས་ཞབས་བྲོར་རོལ།
དེ་རྗེས་འདམ་རྫབ་ཀྱི་ཁེངས་བའི་གསང་ལམ་དུ།
ལག་ན་ཉི་གདུགས་ཐོགས་ནས་འགྲོ་སྐབས།
ཁྱེད་ཀྱི་རང་ལུས་མེར་བསྲེག་བཏང་བའི་གནས་ཚུལ་ཐོས།
ཆར་ཐིག་ཡིན་ནམ་མིག་ཆུ་ཡིན།
ངའི་མཁུར་ཚོས་ཀྱི་རི་སྒང་ཉུལ་ནས།
ངའི་སེམས་ཀྱི་གཤོག་པ་རླན།
ངའི་ཡིད་ལ་སྨུག་པས་གོས་གཡོགས།



དཔའ་བོ་ཚེ་དབང་ནོར་བུ་ལགས།
ཁྱེད་ཀྱིས།
རང་དབང་གི་མེ་ཙག་མཁའ་ལ་ཁྱབ།
འཇིགས་བྲལ་གྱི་འབོད་སྒྲས་ས་གཞི་བསྐང་།
བཙན་གནོན་གྱི་ཆུ་རྙོག་སྟེང་ནས་དཀྲུགས།
ཁྱེད་ཀྱི་ཡོད་ཚད་སྦྱིན་ནས།
ཐོབ་ཤོར་ཀྱི་བསམ་བློ་གཅིག་ཀྱང་མེད་པར།
འབར་བཞིན་པའི་མེ་ལྕེར་གཞོན་ནས།
འཇིག་རྟེན་ཕ་རོལ་ན་གཤེགས།
ཁྱེད་ལ་གཙང་ཆབ་སྔོན་མོ་མཆོད།
ཁྱེད་ལ་ཁ་བས་ལམ་སྣ་འདྲེན།


ཁྱེད་ཀྱི་ལྷག་བསམ་གྱི་རྩམ་པའི་རོ་བཅུད་དེ།
གངས་ཅན་པའི་བླ་སྲོག་གི་གཏེར་སྙིང་ཡིན།
ཁྱེད་ཀྱི་བདེན་པའི་མེ་ཙག་དེ།
ང་ཚོས་སྟོབས་ཤུགས་ཡོད་ཚད་ཀྱིས་གསོ།
ཁྱེད་ཀྱི་འཆི་གསོན་གྱི་སྐུལ་མ་དེ།
ང་ཚོས་ནུས་པ་ཡོད་ཚད་བསྡུས་ནས་འབོད།
ཁྱེད་ཀྱིས་རྐང་རྗེས་ཁྲ་ལམ་ལམ་དེ་དེད་ནས།
ངེད་ཅག་རང་དབང་གི་གོ་འཕང་ཐོབ་ལ་སྙེག

No comments:

Post a Comment